Cangas, capital do municipio do mesmo nome, é unha bonita vila mariñeira, que medrou á beira do mar. Está situada na Ría de Vigo,fronte á cidade de Vigo, pero o litoral do municipio, sementado de praias –cóntanse ata 38-, está bañado tamén polas augas da Ría de Aldán. 

Cangas é unha vila con moita actividade, tanto económica como social e cultural, quizáis pola súa proximidade a cidades galegas importantes e grazas ás boas comunicacións.

As súas xentes son sociables, amables e acolledoras, ás que lle gusta disfrutar nas terrazas dos abundantes cafés, taperías e restaurantes do temperado clima do que goza a vila durante todo o ano.

Da vila de Cangas destaca o paseo marítimo que vai dende o centro ata o final da praia de Rodeira e o casco vello, que conforma un dos conxuntos monumentais máis destacables da costa galega.

Cangas ten un rico patrimonio artístico, que principalmente se concentra no seu casco vello, actualmente en proceso de rehabilitación. Paseando polas súas rúas pódense apreciar interesantes exemplos de arquitectura popular mariñeira. Ademáis no casco vello hai tamén fermosas mostras de arquitectura relixiosa como a ExColexiata de Santiago, cunha portada renacentista que se conta entre as máis belas e armoniosas de toda Galicia.

No pleno centro, moi próximos ao casco vello, atópanse o porto deportivo e a terminal marítima

Sen dúbida un dos maiores atractivos da vila de Cangas é a súa praia urbana: Rodeira.

Rodeira ten case un kilómetro de lonxitude e á súa beira exténdese un paseo de madeira con espléndidas vistas panorámicas da veciña cidade de Vigo. É unha praia que ademáis de grande é fermosa e moi cómoda pola proximidade á vila - está case no centro-

Pero quen visite o litoral cangués sen dúbida non se conformará con visitar só a praia de Rodeira, de seguro tratará de visitar as máis valoradas de entre as 38 praias con que conta o concello, moitas delas recoñecidas coa Bandeira Azul.

Ademáis, estando en Cangas é obrigado visitar a que foi valorada como mellor praia do mundo: a Praia de Rodas, nas veciñas Illas Cíes.

As Íllas Cíes e a Illa de Ons, que forman parte do Parque Nacional Marítimo Terrestre das Illas Atlánticas son un dos principais atractivos turísticos da vila de Cangas, xunto coas praias do rural.

Cangas é a base perfecta para visitar o Parque polos servizos diarios ás Illas Cíes dende o porto de Cangas, e á Ílla de Ons dende as vilas de Aldán e Bueu.

As Illas Atlánticas son un auténtico tesouro natural, recoñecido internacionalmente, e tamén turístico, pola beleza das súas praias, entre as cales  atópase a que, segundo o xornal británico The Guardian, é a praia  máis bonita do mundo: a praia de Rodas, nas Illas Cíes.

Cangas, e todo o seu municipio, están moi ben comunicados coas principais cidades galegas, o que contribúe ao seu crecemento constante e o que facilita a recepción do turismo.

Por terra a vía rápida CG4.1 empalma a comarca coa autoestrada A9 (Vigo / Pontevedra / Santiago / Coruña), permitindo achegarse en menos de media hora a Vigo (30kms), ao aeroporto de Peinador (33kms) ou a Pontevedra (38kms).

O barco é tamén unha boa alternativa para a comunicación con Vigo pola breve duración da viaxe (20 minutos) e pola frecuencia do servizo (cada media hora). O barco tamén é o medio para viaxar ás Illas Cíes (con saída dende o porto de Cangas) ou á Illa de Ons (con saídas dende os portos de Aldán ou Bueu).