Salvaterra de Miño atópase no sur da provincia de Pontevedra, na ribeira do Río Miño, facendo fronteira con Portugal, frente á cidade de Monçao, a 35 kms de Vigo, e dentro da Comarca do Condado, famosa polos seus viños.

Trátase dunha vila fermosa pola súa ubicación, configuración e espazos naturais. É unha vila pequena (o municipio non chega aos doce mil habitantes), na que a Historia está sempre presente á través de importantes monumentos, pero ao mesmo tempo moderna, con interesantes e avanzados servizos aos cidadáns e en pleno desenrolo económico.

Salvaterra é moi coñecida polos seus fermosos espazos verdes e cada vez máis tamén pola construcción do polígono industrial “Plisan”, popularmente chamado “Porto Seco”, que servirá para a expansión comercial do Porto de Vigo.

O “Porto Seco”, pretende ser o futuro polígono industrial de referencia no sur de Galicia, albergando a unhas 400 empresas e estará conectado a través de autovía coa das Rías Baixas (A-52) o que mellorará aínda máis as boas comunicacións de Salvaterra, a só 34 kms de Vigo por autovía.

Entre súas rúas, coa amplitude propia das dunha gran cidade, atopamos a praza e impresionante casa do Concello, a Casa da Cultura, moderna e funcional, e por suposto, importantes monumentos históricos como: a muralla, o castelo, a capela da ouliva, etc.

Todo esto na vila pero, ademáis, cada parroquia ten algún monumento salientable e mecerente dunha visita: as súas igrexas e capelas como é a da Asunción, os pazos de Lira, pazo-torre de Petán, o de Teáns, o das Barreiras, o de Fillaboa, o de San Mauro, o de Piñeiro, o de Souto e o Portal da Inquisición, etc.

Entre os seus atractivos naturais destacan a Illa Fillaboa e o Parque da Canuda con moitos miles de metros cadrados, que ofrece variadísimas atraccións, (auditorio, ximnasio de maiores, parque infantil, granxa educativa etc.) e kilómetros de paseo á beira do Miño, cun extenso carril bici, que pode calquera percorrer nas bicicletas que gratuitamente presta o Concello.

Estes espazos verdes, que fan de Salvaterra a vila galega con máis m2 de zonas verdes por habitante, albergan tamén completas instalacións deportivas: piscinas, pistas de tenis, pista de patinaxe, pista de skate, cancha de baloncesto/futbito, etc.

Unha mostra máis dos avanzados servizos que Salvaterra ofrece aos cidadáns atopámola no feito de que Salvaterra sexa o primerio municipio galego -e un dos poucos de España- que ofrece aos seus veciños un sistema WIFi, denominado Salvaterra Wireless, para o acceso a internet de balde con cobertura en todas as parroquias do municipio.