A cidade de Vigo atópase na parte occidental da provincia de Pontevedra, na metade da ría que leva o seu nome, a máis sureña das Rías Baixas, e segundo moitos, a de maior beleza.

Vigo é a cidade máis poboada de Galicia, con case trescentos mil habitantes, aínda que na realidade probablemente viven nela case medio millón de persoas.

É unha cidade moi nova, moderna, de actividade frenética, cosmopolita e de xentes abertas e amables, acostumadas a recibir forasteiros por motivos laborais ou turísticos.

Vigo é unha cidade marcada polo mar, do que en gran parte depende a súa economía: o sector naval e pesqueiro son de fundamental importancia, sendo como é o primero porto pesqueiro de España e uns dos primeiros do mundo.

Vigo é unha cidade ben comunicada, que conta cunha completa rede de infraestruturas que a conectan cos principais núcleos urbanos galegos, peninsulares e internacionais. O aeroporto de Peinador está a 10 kms do centro.

As magníficas condicións da súa Ría, protexida polas Illas Cíes e pola península do Morrazo, fan que o porto de Vigo sexa un dos máis seguros e valorados de Europa, non só a nivel pesqueiro senón tamén como porto de mercancías e pasaxeiros, e tamén como porto deportivo.

No porto de pasaxeiros de Vigo fan escala os mellores cruceiros do mundo, pois conta cun magnífico peirao de trasatlánticos. Ademáis, dende o porto hai servicios regulares de pasaxeiros, como o diario, cada media hora, ás localidades de Moaña e Cangas, e como o que, durante a Semana Santa e dende maio ata setembro fai varias rutas diarias ásIllas Cíes.

O arquipélago das Illas Cíes está formado por tres illas: San Martiño, Monte Agudo e O Faro (estas últimas unidas por a praia de Rodas e polo Lago dos Nenos). Estas illas forman parte do Parque Nacional Marítimo Terrestre das Illas Atlánticas.

As súas praias son vírxenes e paradisíacas, como a de Rodas, que ten máis dun kilómetro de lonxitude e augas cristalinas de cor verde esmeralda e area fina e branca, o que lle fai merecer ser considerada como unha das mellores praias do mundo.

Pero quen ben coñeza Vigo e a veciña Cangas sabe que hai moitas outras praias que compiten con ela en beleza. Sen ir máis lonxe, Vigo conta con máis de 40 arenais, entre os que destacan O Vao e Samil

Pero Vigo, a pesar da importancia e beleza do seu litoral, é moito máis que iso: é unha cidade cunha dinámica e fértil axenda cultural, con múltiples e variadas oportunidades para o ocio, a formación ou a diversión.

É tamén unha cidade que, aínda sendo nova, garda valiosas pegadas da súa historia, nos seus museos e nas súas rúas. En toda a cidade hai mostras valiosas das correntes arquitectónicas de cada época, que dan beleza e carácter a esta nova cidade que hoxe é Vigo, eminentemente industrial e de servizos.

Tampouco esquece Vigo o seu pasado de vila mariñeira: No centro da cidade, mirando ao mar, atópase o casco vello, que agocha rincóns de alto interese turístico, como o antigo barrio de mariñeiros de O Berbés, a rúa dos cesteiros, a Praza da Constitución, a rúa Real ou " Mercado da Pedra ".